Bonvenon al la retejo de MeKaRo 2023! Ĉi-foje ni ĝuos kamparan ekskurson en la regiono de la Georgia Golfeto, centrigita en la turisma urbo Midland. MeKaRo okazos je la 20a ĝis la 22a de majo, 2023.
Diskutu viajn planojn por MeKaRo 2023 en nia dediĉita Google-grupo.
La Mez-Kanada Renkontiĝo de Esperanto (MeKaRo) estas turisma semajnfino, kiu okazas ĉiujare, alterne en Kebekio kaj en Ontario, dum la longa semajnfino en Majo, t.e., la semajnfino de la Tago Nacia de la Patriotoj en Kebekio kaj de la Viktorina Tago en Ontario. Ĝin organizas la Esperanto-Societo Kebekia kaj lokaj Esperanto-kluboj en Kebekio kaj Ontario.
Oficiale parto de la Granda Lago Huron, kaj ofte nomita la “sesa granda lago,” la Georgia Golfeto estas trezorkesto de abunda natura beleco, kun longa historio de homa navigado. Tradicie ĝi estis kaj la dividilo kaj la ligo inter du grandaj grupoj de indiĝenaj nordamerikanoj – la parolantoj de la irokezaj lingvoj, pli sude, kies kulturo centriĝis je agrikulturo, kaj la parolantoj de la algonkiaj lingvoj, pli norde, vasta kaj forta kulturo de ĉasistoj-kolektistoj. Dum la jarcentoj, tiuj du aroj de kulturoj intermiksiĝis kaj evoluiĝis, kaj ŝanĝiĝis des pli rapide post la aldono de la franca kaj angla kulturoj en la sama regiono. Jam dum du jarcentoj, la Georgia Golfeto estas populara kaj amata destino por ferioj de homoj en la regiono de Toronto. En pli frua epoko oni kutime vojaĝis per trajno ekde Toronto al ferikabanoj ĉe la lago; nuntempe, bedaŭrinde, ni havas anstataŭe la ŝoseon 400.
Nia vizito inkluzivas du urbojn, Midland kaj Penetanguishene (mallonge Penetang), kies nomo (lando de la blankaj ruliĝantaj sabloj) venas en la anglan tra serio de pluraj indiĝenaj lingvoj. La plurlingvismo ankoraŭ vivas ĉi tie. Survoje vi trapasos la historie franclingvan vilaĝon Lafontaine, kie ĉiujare en julio okazas la Festival du Loup (Festivalo de la Lupo), celebro de franc-ontaria kulturo kaj muziko. En la apuda Christian Island, hejmo de la Unua Nacio Beausoleil, oni nun instruas la aniŝnabekan lingvon al junuloj.
